ట్విట్టర్‌కు పోటీగా వచ్చిన స్వదేశీ మైక్రోబ్లాగింగ్ ప్లాట్ఫామ్ ‘కూ’ భారత్‌తో పాటు అంతర్జాతీయంగా అత్యధిక డౌన్‌లోడ్స్‌తో దూసుకుపోతుంది.
ఇటీవల ట్విట్టర్‌లో ఏర్పడ్డ గందరగోళం, ఈ పోర్టల్‌కు ప్లస్ పాయింట్‌గా మారింది. దీంతో ప్రపంచ దేశాల్లో తమ సేవలను విస్తరిస్తామని కూ యాప్ ఓనర్స్ తెలిపారు. ఈ క్రమంలో బ్రెజిల్లో కూ యాప్‌ను లాంచ్ చేయగా, కేవలం 48 గంటల్లోనే 1 మిలియన్ ప్లస్ డౌన్లోడ్స్ సాధించి అందర్నీ ఆశ్చర్యపర్చింది. ఇదే ఉత్సాహంతో త్వరలోనే ఈ యాప్‌ను మరిన్ని దేశాల్లోని యూజర్లకు అందుబాటులోకి తీసుకొస్తామని కంపెనీ ఒక ప్రకటనలో తెలిపింది.
కూ యాప్ సోమవారం బ్రెజిల్లో పోర్చుగీస్ భాషతో పాటు మరో 11 స్థానిక భాషల్లో అందుబాటులోకి వచ్చింది. దీనికి
అక్కడ మంచి రెస్పాన్స్ కనిపిస్తోంది. “బ్రెజిల్ యూజర్లు మాపై చూపుతున్న ప్రేమ, మద్దతును చూసి మేము సంతోషిస్తున్నాం. రిలీజైన 48 గంటల్లోనే బ్రెజిల్‌లోని గూగుల్ ప్లే స్టోర్, యాపిల్ యాప్ స్టోర్ రెండింటిలోనూ అగ్రశ్రేణి యాప్‌గా నిలవడం గొప్ప విషయం. బ్రెజిల్ సోషల్ మీడియాలో స్థానిక భాషతో అందుబాటులో ఉండే యాప్‌లలో ‘కూ’ అతిపెద్ద యూజర్ ఎంగేజ్‌మెంట్ సాధించింది. కూ బ్రెజిల్లో కల్ట్ బ్రాండ్ గా మారింది. అత్యధిక అభిమానుల ఫాలోయింగ్ దక్కించుకుంది.” అని కూ సీఈఓ అప్రమేయ రాధాకృష్ణ తెలిపారు. ఈ ఘనతపై కూ సహ వ్యవస్థాపకుడు మయాంక్ బిదావత్కా మాట్లాడుతూ, టెక్ ఉత్పత్తుల ప్రపంచంలో ‘మేక్ ఇన్ ఇండియా, మేక్ ఫర్ ది వరల్డ్’ ఉద్యమాన్ని ప్రారంభించినందుకు గర్విస్తున్నామని చెప్పారు.
* రెండ్రోజుల్లోనే 1 మిలియన్ డౌన్లోడ్స్
గత కొన్ని రోజులుగా ఆండ్రాయిడ్ ప్లే స్టోర్, యాపిల్ యాప్ స్టోర్ రెండింటిలోనూ కూ అత్యధిక డౌన్‌లోడ్స్‌తో దూసుకుపోతుంది. ప్రస్తుతం ఈ రెండింటిలోనూ ‘కూ’ యాప్ నెంబర్ 1 స్ఠానంలో ఉంది. కేవలం 48 గంటల్లో బ్రెజిల్లో ఈ ప్లాట్ఫామ్ 2 మిలియన్ కూస్, 10 మిలియన్ లైక్‌లను పొందింది. మరోవైపు, ప్రపంచవ్యాప్తంగా ‘కూ’ 50 మిలియన్లకు పైగా డౌన్‌లోడ్‌లను సాధించింది.
* సెలబ్రిటీలు కూడా
ఈ ప్లాట్‌ఫామ్‌లో 7,500 మంది సెలబ్రెటీలు యాక్టివ్‌గా ఉన్నారు. బ్రెజిల్‌కు చెందిన ప్రముఖ సెలబ్రిటీలు, క్లాడియా లీట్, నటుడు బాబు సంతాన, రచయిత్రి రోసానా హెర్మాన్, న్యూస్ పోర్టల్ నిర్వాహకుడు చోక్వి వంటి వారు ఇటీవలే ‘కూ’ యాప్లో చేరారు. సెలబ్రిటీ ఫెలిప్ నెటో ‘కూ’ ప్లాట్‌ఫారమ్‌లో చేరిన కేవలం రెండు రోజుల్లోనే 450,000 మంది ఫాలోవర్లను పొందాడు. దీంతో ‘కూ’ యాప్లో అత్యధిక ఫాలోవర్స్ గల బ్రెజీలియన్ సెలబ్రెటీగా మారాడు.
