ఇకపై స్థానిక మీడియా ప్రసారం చేసే వార్తలకు డిజిటల్ కంపెనీలు చెల్లింపులు చేయాలి;
ప్రపంచ ప్రఖ్యాత కంపెనీలు అయిన ఆల్ఫాబెట్ ఇంక్ కి చెందిన గూగుల్, అలాగే మెటా ప్లాట్ ఫామ్స్ ఇంక్ కి చెందిన ఫేస్ బుక్ వంటి ఆన్ లైన్ డిజిటల్ కంపెనీలు ఇకపై వారికి సంబంధించిన ఫీడ్ ను న్యూజిలాండ్ కి చెందిన స్థానిక మీడియా సంస్థలు ప్రసారం చేసినట్లైయితే, దానికి గాను స్థానిక మీడియా సంస్థలకు ఆన్ లైన్ డిజిటల్ కంపెనీలు చెల్లింపులు చేసే విధంగా చట్టాన్ని ప్రవేశపెడతామని న్యూజిలాండ్ ప్రభుత్వం తెలిపింది.
ఆస్ట్రేలియా, కెనడాలలో ఇప్పటికే అమలవుతున్న ఇలాంటి చట్టాల ఆధారంగా ఈ చట్టాన్ని రూపొందించినట్లు న్యూజిలాండ్ బ్రాడ్ కాస్టింగ్ మంత్రి విల్లీ జాక్సన్ ఆదివారం ఒక ప్రకటన ద్వారా తెలిపారు. ఈ చట్టం కారణంగా స్థానిక వార్తా సంస్థలతో ఒప్పందాలను చేసుకోవడానికి డిజిటల్ ప్లాట్ ఫారమ్ కంపెనీలకు ప్రోత్సాహకంగా ఉంటుందని ఆయన ఆశాభావం వ్యక్తం చేశారు.
ఆఫ్ లైన్ కంటే ఆన్ లైన్ లో ఎక్కువ ప్రకటనలు రావడంతో న్యూజిలాండ్ వార్తా మాధ్యమాలు ముఖ్యంగా చిన్న ప్రాంతీయ, కమ్యూనిటీ వార్తాపత్రికలు ఆర్థికంగా నిలదొక్కుకోలేకపోతున్నారని జాక్సన్ తెలిపారు. ప్రాంతీయ వార్తా మాధ్యమాలు ప్రసారం చేసే కంటెంట్ ద్వారా ప్రయోజనం పొందుతున్న ఆన్ లైన్ డిజిటల్ కంపెనీలు సదరు ప్రసారాల కోసం కొంత మొత్తాన్ని స్థానిక వార్తాపత్రికలకు చెల్లించడం చాలా ముఖ్యం అని జాక్సన్ తెలిపారు.
ఈ కొత్త చట్టం ఆమోదం కోసం న్యూజిలాండ్ పార్లమెంటులో ఓటింగ్ కు వెళుతుందని, అక్కడ అధికారంలో ఉన్న లేబర్ పార్టీకి మెజారిటీ ఉంది కావున ఆ చట్టం ఆమోదం పొందుతుందని జాక్సన్ తెలిపారు. ఇంటర్నెట్ కంపెనీలు మీడియా అవుట్ లెట్ లతో కంటెంట్ సరఫరా ఒప్పందాలపై చర్చలు జరిపే అధికారాన్ని ప్రభుత్వానికి ఇస్తూ 2021 సంవత్సరంలో ఆస్ట్రేలియా ప్రభుత్వం ఒక చట్టాన్ని ప్రవేశపెట్టింది. దీనికి సంబంధించి గత వారం ఆస్ట్రేలియా ప్రభుత్వం విడుదల చేసిన సమీక్షలో ఈ నిర్ణయం కారణంగా స్థానిక వార్తా సంస్థలు లాభపడినట్లు జాక్సన్ తెలిపారు.
