ఈ రోజు నుంచి ప్రారంభం కానున్న రిటైల్ డిజిటల్ రూపీ పైలట్;
రిజర్వ్ బ్యాంక్ ఆఫ్ ఇండియా (ఆర్బీఐ), డిసెంబర్ 1న అనగా ఈ రోజు రిటైల్ డిజిటల్ రూపాయి (ఈఆర్ -ఆర్) ని ప్రయోగాత్మకంగా ప్రారంభించనున్నట్లు ప్రకటించింది. ఆర్బీఐ విడుదల చేసిన ప్రకటన ప్రకారం, పైలట్ ప్రాజెక్ట్ లో పాల్గొనే ఎంపిక చేసిన నగరాలకు చెందిన వినియోగదారులు, వ్యాపారులతో కూడిన క్లోజ్డ్ యూజర్ గ్రూప్ డిజిటల్ రూపాయి ద్వారా లావాదేవీలు జరపనుంది. భాగస్వామ్య బ్యాంకులు అందించే డిజిటల్ వాలెట్ ద్వారా వినియోగదారులు డిజిటల్ రూపాయిని ఉపయోగించి లావాదేవీలు జరపవచ్చు.
గత నెలలో ఆర్బీఐ హోల్ సేల్ సెగ్మెంట్ లో డిజిటల్ రూపాయిని పైలట్ ప్రాజెక్ట్ గా ప్రారంభించిన విషయం తెలిసిందే.అయితే ఇది సాధారణ వినియోగదారులకు అందుబాటులో ఉండదు.
డిజిటల్ రూపాయి గురించి మీరు తెలుసుకోవాల్సిన ముఖ్య విషయాలను మీ కోసం కింద తెలియచేయడం జరిగింది.
1) ఈఆర్-ఆర్ అనేది లీగల్ టెండర్ ను కలిగిన డిజిటల్ టోకెన్ రూపంలో ఉంటుంది.
2) ప్రస్తుతం పేపర్ కరెన్సీ, కాయిన్లను జారీ చేసిన అదే డినామినేషన్లలో డిజిటల్ రూపాయిని కూడా ఆర్బీఐ జారీ చేయనుంది.
3) ఇది మధ్యవర్తులు, బ్యాంకుల ద్వారా పంపిణీ అవుతుంది.
4) ఈ పైలట్ ప్రాజెక్ట్ లో భాగస్వామ్యం కోసం ఎనిమిది బ్యాంకులను గుర్తించినట్లు సెంట్రల్ బ్యాంకు తెలిపింది.
5) మొదటి దశలో దేశవ్యాప్తంగా నాలుగు నగరాల్లోని స్టేట్ బ్యాంక్ ఆఫ్ ఇండియా, ఐసీఐసీఐ బ్యాంకు, యస్ బ్యాంకు, ఐడీఎఫ్సీ ఫస్ట్ బ్యాంకులు భాగం కానున్నాయి.
6) అనంతరం రెండవ దశలో బ్యాంక్ ఆఫ్ బరోడా, యూనియన్ బ్యాంక్ ఆఫ్ ఇండియా, హెచ్డీఎఫ్సీ బ్యాంక్, కొటక్ మహీంద్రా బ్యాంకులు ఈ పైలట్ లో భాగం కానున్నాయి.
7) పైలట్ ప్రాజెక్ట్ లో భాగంగా మొదట ముంబై, న్యూఢిల్లీ, బెంగళూరు, భువనేశ్వర్ నగరాల్లో డిజిటల్ రూపీని ప్రారంభించనున్నారు.
8) కొన్ని రోజుల తరువాత అహ్మదాబాద్, గాంగ్టక్, గౌహతి, హైదరాబాద్, ఇండోర్, కొచ్చి, లక్నో, పాట్నా, సిమ్లాలలో డిజిటల్ రూపీని ఆర్బీఐ విస్తరించనుంది.
9) వినియోగదారులు రిజిస్టర్డ్ బ్యాంకులు అందించే డిజిటల్ వాలెట్ ద్వారా, అలాగే మొబైల్ ఫోన్లు లేదా డివైజెస్ లో స్టోర్ చేయడం ద్వారా ఈఆర్-ఆర్ తో లావాదేవీలు జరపవచ్చు.
10) డిజిటల్ రూపీని ఉపయోగించి వ్యక్తి నుంచి మరొక వ్యక్తికి (పీ2పీ), అలాగే వ్యక్తి నుంచి వ్యాపారికి లావాదేవీలు చేయవచ్చు. మర్చంట్ వద్ద డిస్ ప్లే చేసిన క్విక్ రెస్పాన్స్ (క్యూ ఆర్) కోడ్ లను ఉపయోగించి మర్చంట్ లకు చెల్లింపులు చేయవచ్చు.
